Ռոպին Շարմայի «Առաւօտեան Ժամը Հինգի Ակումբը»

 

 

«Օրուան առաջին մասին շատ հոգ տարէք, եւ օրուան մնացեալ մասը ինքնիրեն կը հոգացուի: Տէր կեցէք ձեր առաւօտուան, որպէսզի հիմնաւորապէս բարելաւէք ձեր կեանքը»

Ռոպին Շարմա

 

Մեզմէ շատերուն համար, առաւօտեան ժամը հինգին արթննալը խիստ անհրապոյր կը թուի: Մեզմէ շատերը կը նախընտրեն առաւօտները աւելի երկար անկողինին մէջ մնալ. մենք չենք սիրեր ստիպել մենք զմեզ աւելի կանուխ արթննալ «քան պէտք է»: Բայց ի՞նչ կ'ըսէք, եթէ իմանաք, որ առաւօտեան ժամը 5-ին արթննալը յաջողութեան բանալին է:

Ռոպին Շարմա իր «Առաւօտեան Ժամը Հինգի Ակումբը» գիրքին մէջ պատմութիւն մը կը գործածէ ցոյց տալու համար իր համոզումը, թէ կանուխ արթննալը արդիւնաւէտութեան եւ յաջողութեան բանալին է: Պատմութիւնը կը վերաբերի միլիառատիրոջ մը, որ որոշած էր խորհրդատու ըլլալ դժուարութիւններ ունեցող արուեստագէտի մը եւ ձեռնարկատիրոջ մը: Առաջին բանը որ ան կ'որոշէ սորվեցնել արուեստագէտին, առտուան վրայ «յաղթանակ» տանելու կարեւորութիւնն է:

Ինչպէ՞ս «կը յաղթենք» առաւօտը, պիտի հարցնէք:

Առաջին գաղափարը «Յաղթանակի ժամն» է: Առաւօտեան ժամը 5-ին արթննալը օգուտ չունի եթէ ժամանակը վատնէք մինչեւ ժամը 7 կամ 8՝ առանց արդիւնաւէտ բան մը ընելու: Շարմա կը ներկայացնէ «20-20-20» ծրագիր-կառուցուածք մը առաւօտեան ժամը 5-էն մինչեւ 6-ը: Եթէ այս ժամը լաւ օգտագործէք, օրուան մնացած բոլոր գործերն ու զբաղումները, հանգիստը՝ ներառեալ, աւելի դիւրին եւ արդիւնաւէտ տեղի կ'ունենան:

Ինչպէս կռահեցիք, «20-20-20» կառուցուածքը մէկ ժամը կը բաժնէ երեք փուլերու.

1. Շարժում (5:00–5:20): Ասիկա կրնայ ըլլալ արագ ու խիտ վարժութիւն մը, եոկա, կամ ծանրամարզութիւն: Նպատակն է սրտի զարկերը արագացնել, քրտնիլ եւ դրդել, որ մարմինը գորթիզոլ արձակէ արթննալուն պէս: Առաւօտեան մարզանքը մեզ կատարեալ ինքնագիտակից, արթուն վիճակի մը մէջ կը դնէ:

2. Խորհրդածութիւն եւ խոկում (5:20–5:40): Գրի՛ առէք ինչ որ պէտք է իրագործէք օրուան յաջորդ ժամերուն ընթացքին կամ օրագիրի պէս արձանագրեցէք այն ինչ որ ձեր միտքին մէջ է կամ ձեզ կը մտահոգէ: Կիրարկեցէք meditation`խոկում: Այս 20 վայրկեանը կեդրոնացումի եւ պարզ մտածելուն տրամադրուած պահն է:

3. Սորվիլ (5:40–6:00): Գիրք մը կարդացէք, փոտքասթ մը մտիկ ըրէք, կամ ուսումնասիրեցէք նիւթ մը, որ ներկայիս ձեզ կը հետաքրքրէ: Այս ժամանակը գործածեցէք ուղեղը աշխոյժ, աշխատելու տրամադիր վիճակի մը մէջ բերելու համար:

«20-20-20»-ը սկսելու ատեն պէտք է խուսափիլ երկու բաներէ.

Եթէ առաւօտեան ժամը 5-ին արթննալը կը նշանակէ որ միայն քանի մը ժամ քուն պիտի ունենաք, յարմարցուցէք ձեր երեկոյեան ծրագիրը՝ ապահով ըլլալու համար որ 6-8 ժամ պիտի քնանաք: Ինչպէս առածը կ'ըսէ՝ «մոմը երկու ծայրէն չէք կրնար վառել»:

«20-20-20»-ը քարացած եւ անփոփոխ կանոն մը չէ: Անիկա սկզբնակէտ մըն է: Եթէ աւելի արդիւնաւէտ կը դառնաք կէս ժամ մարզանքով եւ միայն 10 վայրկեան խորհրդածութեամբ, այդպէս ըրէք: Այս ծրագիրը յարմարցուցէք ձեր առանձնայատկութեան՝ պարզապէս փորձեցէք իւրաքանչիւր բաժին անպայման կատարել ու աւարտել:

Յաջորդ գաղափարը «սովորութեան պահպանում»ն է:

«Առաւօտեան Ժամը Հինգի Ակումբը» գիրքի հեղինակ Ռոպին Շարմա Թաջ Մահալը կը գործածէ իբրեւ կատարեալ օրինակ սովորութիւններու ստեղծման եւ մշակման: Թաջ Մահալի կառուցումը 20 տարի տեւեց: Կամքի ոյժով եւ հզօր հետեւողականութեամբ, շինութիւնը վերջապէս աւարտեցաւ: Մեր սովորութիւնները նոյնը պէտք է ըլլան: Պէտք պիտի ունենանք կամքի ոյժ՝ զանոնք սկսելու եւ հետեւողականութիւն՝ զանոնք ինքնաբերական, ինքնագործ դարձնելու համար: Երբ անոնք ինքնաբերական դառնան, մեր առօրեային մաս կը կազմեն, եւ այլեւս անոնց մասին մտածելու պէտք չենք ունենար:

Յաջողակ Մարդոց Չորս Կեդրոնացումները

Ռոպին Շարմա իր գիրքին մէջ կ՛ընդգծէ չորս «կեդրոնացումներ», որոնք անհրաժեշտ կը համարէ զանազան ասպարէզներու մէջ մարդոց յաջողութեան համար:

1. Կարողութիւններու կեդրոնացում. յայտնաբերեցէք եւ մշակեցէք ձեր բնական տաղանդներն ու ձիրքերը: Այս պարգեւները իրենք իրենց չեն դրսեւորուիր՝ պէտք է զանոնք զարգացնէք աշխատանքով:

2. Շեղումներու վերացում. Խուսափեցէք ծանրաբեռնուելէ այս ու այն կողմէն խուժող տեղեկատուութեամբ կամ ընկերային ցանցերով: Կեդրոնացէք քանի մը կարեւոր գործերու վրայ՝ առանց ընդհատումներու:

3. Անձի զարգացում. ձեր առօրեային մէջ ընդգրկեցէք ինքնախօսակցութիւնը, «սրտի ձայն»ը (զգացումներ), ֆիզիքական առողջութեան պահպանումը եւ «հոգիի մարզանքը» (խոկում):

4. Յաջողութեան կուտակում. Յառաջընթացի թափը ստեղծեցէք՝ հետեւողականօրէն յաջողակ օրեր ստեղծելով: Սովորութիւններն ու հետեւողականութիւնն են, որ յաջողութեան կ'առաջնորդեն, եւ ոչ թէ կարճատեւ  պոռթկումները:

 

Գերազանցութեան 10 մարտավարութիւններ

Ռոպին Շարմա կը թուէ 10 մարտավարութիւններ, որոնք մեզ կ՛առաջնորդեն լաւագոյնս իրացնելու մեր կարողութիւնները՝ զանոնք գերազանցութեան հասցնելու չափ։

1․ Ստեղծել կեդրոնացումի անանցանելի շրջանակ մը․գործեցէք շեղումներէ եւ բացասականութենէ զերծ տարածքի մը մէջ:

2. 90/90/1 կանոն. յաջորդ 90 օրերուն, աշխատանքային օրուան առաջին 90 վայրկեանները տրամադրեցէք ձեր մէկ՝ ամենակարեւոր գործին կամ ծրագիրին:

3. 60/10 մեթոտը. Աշխատանքային օրը բաժնեցէք 60 վայրկեան կեդրոնացումի հատուածներու, որոնց կը յաջորդեն 10-ական վայրկեան հանգիստի պահեր:

4. «Օրուան հինգը». Գրի՛ առէք հինգ գործ որ պէտք է կատարել իւրաքանչիւր օր եւ ջնջեցէք այդ գրառումները՝ երբ գործը աւարտէք:

5. «Երկրորդ շունչի» մարզանքը. Աշխատանքի ընթացքին կամ անորմէ ետք, թեթեւ մարզանքներ ըրէք՝ ինչպէս քալել՝ նոր շունչ առնելու կամ վերալիցքաւորուելու համար:

6. Շաբաթական երկու «մերսում». աշխատանքային շաբթուան համարկեցէք երկու հաճելի գործունէութիւններ, ինչպէս ընկերոջ մը հետ հանդիպիլը կամ դուրսը ճաշել:

7. «Երթեւեկի վարժարանը». Սեփական ինքնաշարժով թէ հանրային փոխադրամիջոցով՝ երթեւեկի, փոխադրութեան ժամանակը գործածեցէք ձայնագիրքեր կամ փոտքասթներ մտիկ ընելու համար:

8. Օգնականներու դերը. Այլոց յանձնարարեցէք ձեր այն գործերը որոնք անպայմանօրէն ձեր ուշադրութիւնը կամ սկզբնական ներդրումը չեն պահանջեր:

9. Շաբաթական նախագծումի համակարգը. Ծրագրեցէք ձեր շաբաթը, ներառեալ՝ կեդրոնացումի շրջանակները, մարզանքները եւ անձնական ազատ ժամանակը:

10. Օրական ուսուցում. Օրական 60 վայրկեան տրամադրեցէք նոր բան մը սորվելու՝ ուղեղը աշխոյժ պահելու համար:

Ամփոփենք․ «Առաւօտեան Ժամը Հինգի Ակումբ» գիրքին գլխաւոր դասը առաւօտեան խելամիտ, նպատակաուղղուած եւ օրուան մնացեալ մասը յաջողութեամբ առաջ տանելու ծրագիր մը ստեղծելն է: Կանուխ առաւօտեան մարտահրաւէրը դիմագրաւող «յաղթանակի ժամը» սկզբնակէտ մըն է, զոր կարելի է յարմարցնել ձեր կարիքներուն:

(հրատարակուած է Պայքար շաբաթաթերթին մէջ, 2025)